“Juriyat” kichik sanoat zonasida tadbirkorlar muammolari o‘rganildi

Samarqand viloyat sanoat zonalarini boshqarish direksiyasi tomonidan Jomboy tumanidagi “Juriyat” kichik sanoat zonasida elektron onlayn auksion orqali yer maydonlarini yutib olgan tadbirkorlar bilan amaliy uchrashuv o‘tkazildi.

Unda Samarqand viloyati Davlat bojxona boshqarmasi xodimlari, Direksiya mas’ul xodimi hamda tumandagi tegishli tashkilotlar vakillari ishtirok etdi.

Uchrashuvda tadbirkorlarning faoliyatini boshlash bilan bog‘liq muammolari, jumladan, kredit mablag‘larini jalb etish va loyiha ishlarini amalga oshirish masalalari muhokama qilindi.

Aniqlangan muammolarni bartaraf etish yuzasidan mas’ullarga tegishli topshiriqlar berilib, ayrim masalalar joyida hal etildi. Direksiya tomonidan loyihalarni o‘z vaqtida ishga tushirish va tadbirkorlarga amaliy ko‘mak ko‘rsatish ishlari davom ettirilmoqda.