Yangiliklar

Payariq tumanidagi “Xalqobod” kichik sanoat zonasida loyihalar o‘rganildi

Samarqand viloyati sanoat zonalarini boshqarish direksiyasi direktori D. Xabibullayev Payariq tumani “Xalqobod” kichik sanoat zonasi hududida amalga oshirilayotgan loyihalar bilan yaqindan tanishdi.

Tashrif davomida tadbirkorlarning muammo va takliflari tinglandi, ishlab chiqarish jarayonlari o‘rganildi hamda mavjud kamchiliklarni bartaraf etish bo‘yicha tegishli ko‘rsatmalar berildi. Shuningdek, loyihalarning amalga oshirilish sur’atlari, ish o‘rinlari yaratish imkoniyatlari va infratuzilma bilan ta’minlanish holati bo‘yicha tahliliy suhbatlar o‘tkazildi.

Direksiya rahbari tomonidan sanoat zonasida tadbirkorlik faoliyatini qo‘llab-quvvatlash, ishlab chiqarish quvvatlarini kengaytirish hamda yangi investitsiyalarni jalb etish bo‘yicha zarur tavsiyalar berildi.

Samarqand tumani “Oxalik” YSTZda yangi suv inshooti ishga tushirildi

Samarqand tumani “Oxalik” yoshlar sanoat va tadbirkorlik zonasida suv ta'minoti bilan bog‘liq muammolarni bartaraf etish maqsadida yangi suv inshooti barpo etildi va foydalanishga topshirildi.

Loyiha doirasida 1,5 km uzunlikdagi suv tarmog‘i tortilib, sanoat zonasi ishtirokchilari uchun zarur sharoitlar yaratildi. Qurilish ishlari uchun 1,3 mlrd so‘m mablag‘ yo‘naltirildi.

Ushbu infratuzilma obyekti tadbirkorlarning ishlab chiqarish jarayonini barqaror suv bilan ta’minlashga xizmat qiladi va hududda yangi loyihalarning faol ishlashiga poydevor yaratadi.

Jomboy tumani “Naymantepa” kichik sanoat zonasida tadbirkorlar muammolari bartaraf etildi

Sanoat zonalarini boshqarish direksiyasi rahbari D. Xabibullayev “Naymantepa” kichik sanoat zonasida faoliyat yuritayotgan tadbirkorlar bilan o‘rganish ishlari olib bordi. Jarayonda ularning qurilish ishlariga to‘sqinlik qilayotgan masalalar ko‘rib chiqildi.

Tuman hokimligi, kadastr va ekologiya bo‘limlari bilan hamkorlikda o‘tkazilgan muhokamalar natijasida mavjud to‘siqlar bartaraf etildi. Tadbirkorlarning yer hujjatlari, loyiha tasdiqlari va ekologik talablar bo‘yicha yuzaga kelgan noaniqliklar joyida hal etilib, ularning qurilish jarayonini davom ettirishiga sharoit yaratildi.

Ushbu choralar kichik sanoat zonasida investitsiya loyihalarining o‘z vaqtida amalga oshirilishiga, yangi ish o‘rinlari yaratilishiga va hudud sanoat salohiyatining oshishiga xizmat qiladi.

Nurobod tumanidagi sanoat zonalarida loyihalar o‘rganildi

Nurobod tumanida joylashgan sanoat zonalarida amalga oshirilayotgan ishlar Direksiya direktori D. Xabibullayev tomonidan o‘rganildi. Tashrif davomida faoliyati to‘xtab qolgan, qurilish jarayonlari boshlangan hamda amalga oshirilishi rejalashtirilgan loyihalar holati batafsil ko‘zdan kechirildi.

Direktor har bir loyiha bo‘yicha tadbirkorlar bilan muloqot qilib, mavjud muammolar, kechikish sabablari va texnik-texnologik talablar bo‘yicha takliflarni tingladi.

Uchrashuv davomida ishlab chiqarishni jadallashtirish, infratuzilma bilan ta’minlash, zarur hujjatlar va ruxsatnomalar bo‘yicha ko‘mak ko‘rsatish yuzasidan ham topshiriqlar berildi. Mazkur o‘rganishlar sanoat zonalarida loyihalarning barqaror amalga oshirilishini ta’minlash, yangi ish o‘rinlari yaratish va hudud iqtisodiy salohiyatini oshirishga xizmat qiladi.

Payariq tumani “Xalqobod” sanoat zonasiga 30 km tabiiy gaz tarmog‘i tortilmoqda

Payariq tumanida sanoat hududlarini energiya resurslari bilan ta’minlash maqsadida yirik infratuzilma loyihasi amalga oshirilmoqda. Loyihaga ko‘ra, “Xalqobod” sanoat zonasiga 30 kilometr uzunlikda tabiiy gaz tarmog‘i qurish ishlari olib borilmoqda.

Mazkur loyiha uchun 5,8 milliard so‘m mablag‘ ajratilgan bo‘lib, hozirda qurilish-montaj ishlari bosqichma-bosqich davom ettirilmoqda.

Loyihaning amalga oshirilishi “Xalqobod” kichik hamda yoshlar sanoat va tadbirkorlik zonalarida yangi ishlab chiqarish quvvatlarining ishga tushishi, korxonalar faoliyatining kengayishi va hudud iqtisodiy rivojlanishiga katta hissa qo‘shishi kutilmoqda.

Kichik hamda yoshlar sanoat va tadbirkorlik zonalarida muammolar o‘rganildi

Samarqand viloyat sanoat zonalarini boshqarish direksiyasi davlat muassasasi direktori D. Xabibullayev Jomboy hamda Bulung‘ur tumanlaridagi kichik va yoshlar sanoat zonalari ishtirokchilari bilan uchrashuv o‘tkazdi.

Uchrashuv davomida sanoat zonalaridagi mavjud holat, tadbirkorlik faoliyatini rivojlantirish jarayonlari, shuningdek, bir qator yechilishi zarur bo‘lgan masalalar batafsil ko‘rib chiqildi.

Direksiya rahbari har bir masalani alohida ko‘rib chiqib, kamchiliklarni bartaraf etish, ishlab turgan korxonalar faoliyatini qo‘llab-quvvatlash hamda ishga tushmay qolgan loyihalarni faollashtirish bo‘yicha tegishli vazifalarni belgilab berdi.

Uchrashuv yakunida sanoat zonalarida samarali faoliyat yuritish, ishlab chiqarish quvvatlarini oshirish va yangi ish o‘rinlari yaratish bo‘yicha kelgusi rejalar muhokama qilindi.

Jomboy tumanidagi “Naymantepa” kichik sanoat zonasida bunyodkorlik ishlari boshlandi

Jomboy tumani “Naymantepa” kichik sanoat zonasida tadbirkorlikni rivojlantirish va ishlab chiqarish uchun zarur sharoitlar yaratish maqsadida amaliy ishlar olib borilmoqda. Hududda tadbirkorlar tomonidan yer maydonlari tekislanib, kelgusida quriladigan ishlab chiqarish korxonalari uchun zarur poydevor tayyorlanmoqda.

Tadbirkorlarning faol tashabbusi bilan ushbu tayyorgarlik ishlari sanoat zonasida yangi ishlab chiqarish quvvatlarini yaratishga mustahkam asos bo‘ladi.

Mazkur sharoitlar tuman iqtisodiyotining o‘sishiga, yangi ish o‘rinlari paydo bo‘lishiga hamda investorlar uchun qulay muhit shakllanishiga xizmat qiladi.